سؤالك بالضبط عن كيف المتداول يحافظ على نسبة المخاطرة الي حددها بالضبط في حال ان بيانات الصفقه خصوصا وقف الخسارة اعطانا نسبة اقل.

طبعا الامثلة واضحة ،المثال الاول مبلغ الدخول الي يعطي نسبة مخاطرة 2% اقل من راس المال وهذا هو المطلوب تدخل ب 8000 وفي حال الصفقه خسرت انت خسران 2% فقط من راس المال ككل

ولكن المثال الثاني بناء على وقف الخسارة ،مبلغ الدخول يحتاج يكون اكبر من راس المال عشان تخسر 2% في حال الصفقه خسرت ،وهذا بالضبط ليش الحسبة اعطتك مبلغ دخول ضعف راس مالك لأن انت تبحث عن مخاطرة 2%،وهذا يعني كذلك انك لو دخلت براس مالك بالكامل نسبة المخاطرة راح تكون فقط 1% تقريبا 

طيب الحين السؤال ،هل دامك حددت نسبة مخاطرة 2% ،لازم تلتزم بها بالضبط في جميع الحالات ؟

نعم نلتزم بنسبة المخاطرة بحيث مانخاطر باكثر منها هذا هو الاهم ،ولكن لامانع انه احيانا نخاطر باقل ،يعني لو انت ضبطت نسبة مخاطرة حسابك على 2% وجاتك بعض الصفقات نسبة المخاطرة فيها اقل من 2% تبقى صفقات مقبولة تقدر تاخذها من حين للآخر وهذا بينعكس على نسبة المخاطرة الاجمالية للحساب مع الوقت ،مع ملاحظة ان ماتقل نسبة المخاطرة عن 1% بشكل كبير لأن كذا بتصير الصفقه غير مجدية بالنسبة للعائد.

يعني في الحالات الي بتحصل فيها مبلغ الدخول اكبر من راس مالك بكل بساطة هذا يعني انك مجبر تقلل نسبة المخاطرة في هذي الصفقه وبالتالي مبلغ الدخول بيكون هو راس المال بالكامل مع نسبة مخاطرة اقل 

بس اذا انت منضبط بنسبة مخاطرة ثابته لاتقبل باقل منها الحلول المتاحة هي انك تبحث عن فرص اخرى تتيح نفس نسبة المخاطرة او انك تبعد وقف الخسارة اذا كان فيه سبب فني اقوى وكنت تعتمد وقف خسارة قريب جدا هذا بيقلل مبلغ الدخول مباشرة ويعطي الصفقه مساحة اكبر دامك في حدود نسبة المخاطرة الي اخترتها

في حال كنت تداول سكالبنج او كان عندك حد للمخاطرة اليومية او الاسبوعية او الشهرية ،تقدر تحقق نسبة المخاطرة من خلال اكثر من صفقه ،مثلا صفقتين ،يعني تدخل الصفقه الاولى ب 1% واذا اغلقتها تدخل في صفقه ثانية كذلك ب 1% وتعتبر مخاطرة الصفقتين كنسبة مخاطرة يومية الي هي 2% . او الي يستخدم ال DCA كذلك ممكن يستخدم مجموع المخاطرة بحيث تكون ضمن مخاطرة الحساب.

هذا الشي راجع لك وحسب طريقة ادارتك لتداولك،الاهم هو انك ماتتعدى نسبة المخاطرة المحددة.

2025-09-20 21:04:32

سؤالك ممتاز جدا لأن فعلا الباكتست في سوق مفتوح يختلف عن الباكتست في سوق محدود

الهدف من الباكتست هو محاكات التداول الفعلي والحصول على بيانات واحصائيات قريبة من التداول الفعلي ولكن اذا كان السوق مفتوح 24 ساعة مثل الفوركس او الكريبتو هنا بيصير فيه عامل مهم بيلتغي من المعادلة وهو ان طريقة تسلسل الصفقات في الاختبار وسلوك عمل الاختبار راح يختلف بشكل كبير عنه في التداول الفعلي بسبب استحالة أخذ جميع الصفقات خلال ال 24  (الا اذا كان فيه تداول آلي)

بس الشخص مستحيل أنه يداوم 24/7 في السوق ويتداول جميع الاشارات بالضبط هذا الشي بيغير النتائج بشكل دراماتيكي لو أنه أختبر جميع الصفقات متتابعة.

هدف الباكتست هو محاكات التداول الفعلي عشان كذا لازم يحاكي اسلوبك وطريقة تداولك والاوقات الي بتكون متواجد فيها ,كذا راح تكون النتائج قريبة من الواقع ,كل شخص يتداول بيصير عنده روتين معين وأوقات معينة مع الوقت راح تتحول لأنماط محددة ,أنت الي يفيدك هو انك تعرف أداء الاستراتيجية في هذي الانماط ,الفكرة هي أنك تحاول تخلي الباكتست نفس أسلوبك في التداول الحقيقي عشان يعكس أدق أداء للاستراتيجية لمن تستخدمها باسلوبك وهذي النقطة دائما أأكد عليها في مقاطع الاختبارات (لازم يكون اختبار اي استراتيجية في نفس السوق ونفس الفريم وبنفس أسلوب التداول لكل شخص)

2025-09-14 19:10:29

لقيت هذا السؤال اتوقع هو نفسه الي سالتيه في التلجرام بحط نفس الاجابة عشان يستفيد الي يقراها:

وقف الخسارة يكون حسب نوع التداول هل انتي داخله مضاربة او استثمار

والصحيح هو انك من البداية تحددينه كم السعر الي لو وصله السهم خلاص انتي ماتقدري تستمري

ببساطه تبيعي الكمية وتقبلي بالخسارة وتخرجي 

الحين انتي تقولي انك دخلتي شركة نايس ون بالبداية،نايس ون توها مالها شهرين او 3 في السوق توها جديدة ،هل انتي تقصدي دخولك من الاكتتاب او انتي اشتريتي بعدما طرحت.

مثل هذي الشركات الجديدة لاينصح بالتداول فيها خصوصا استثمار  لانها بتكون لسه جديدة ومافيه بيانات تاريخية الواحد يقدر يعتمد عليها لرؤية بعيدة المدى 

فانتي الحين لو داخله من الاكتتاب بيكون مبلغك بسيط وبالتالي الخسارة بسيطة انتي قرري اذا تبي تستمري او تبيعي وتوقفي خسارتك وتخرجي 

اما لو داخله بمبلغ كبير بعد ماطرحت الشركة فهنا الخسارة بتكون كبيرة ،عشان كذا الان لازم تحللي الشركة ماليا وتشوفي قوتها ماليا 

اذا الشركة تعبانة وخسرانه انصح بالتخارج 

اما لو الشركة قوية عندك خيارين حسب تحملك للخسارة 

اذا تقدري تتحملي الخسارة الحالية اطلعي لان زي ماذكرت الشركة جديدة وصعب تحليلها فنيا عشان تتجنبي مزيد من الخسائر

اما لو كانت الخسارة متحملة وعندك قدرة على المراوغة ومايهمك عامل الوقت تقدري تستخدمي طريقة الخروج بنصف الكمية وتوفير سيولة وتقسيمها لاجزاء صغيرة ثم الشراء عند الدعوم والبيع عند المقاومات ،في الحالة هذي استخدمي فريم الساعة لان الفريم اليومي مافيه بيانات كافية

بالتوفيق

2025-05-08 07:36:48

الفريم الكبير ثم التدرج بالفريمات للوصول للفهم السوق والحركة ومناطق

2025-06-16 10:24:02

انا كنت ازعل على هذه الحالات ولكن انظر للموضوع بنطاق أوسع وأسبوعي أو شهري , سترى ان الفرص الأمنه أقضل وموجودة

2025-06-16 10:41:01

تدخل على الصفقة نفسها وتحدد كمية البيع الذي تود تنفيذة

2025-06-16 10:19:31

بداية في التداول بشكل عام لازم نفرق بين التحليل و التنفيذ

التحليل يتم في منصات مخصصة تتيح أدوات وبيانات تساعد في التحليل مثل منصة تريدنج فيو او تكرتشارت او ميتاتريدر… 

التنفيذ الي هو الشراء والبيع بمعنى الدخول للسوق يلزم وسيط الي يربطك بالسوق والوسطاء يختلفون حسب السوق وحسب البلد,مثلا الاسهم ,بيكون فيه شركات وساطة هي الي عن طريقها يتم الشراء والبيع ومقابل الوساطة هذي تاخذ عمولات عن كل عملية ,البنوك كذلك أغلبها بيكون عندها شركات وساطة فالوسطاء ممكن يكونون شركات منفصلة أو تابعة لأحد البنوك.

في اسواق اخرى مثل الفوركس كذلك فيه وسطاء يمكنون من التداول في الفوركس وفيه وسطاء يدعمون أكثر من سوق ,ومهم البحث جيدا قبل اختيار الوسيط المناسب خصوصا من جانب الموثوقية والمصداقية وحصوله على التصاريح اللازمة ,ايضا من ناحية الخدمة والعمولة…

عشان تقدرين تداولين لازم اولا تفتحين حساب أو محفظة في وسيط يدعم السوق الي بتداولين فيه بعد كذا التنفيذ في الاصل يكون من خلال الوسيط وليس من خلال منصة التحليل ,ولكن بعض الوسطاء يمكن ربطهم بمنصات التحليل لتسهيل عملية التنفيذ من نفس المنصة الي يتم فيها التحليل ,مثلا ربط الوسيط بمنصة تريدنج فيو فيصير من خلال تريدنج فيو نقدر ننفذ اوامر الشراء والبيع ونقدر نستعرض تفاصيل الحساب كأننا في الوسيط نفسه

مثلا ربط تريدنج فيو ببعض وسطاء الاسهم او الفوركس او الكريبتو كربط دراية المالية بالنسية للسوق السعودي

او استخدام منصة ميتاتريدر الي تدعم عدد كبير من الوسطاء خصوصا بالنسبة للي يتداولون فوركس

او بالنسبة للسوق السعودي ربط برنامج تكرتشارت مع منصة دراية المالية او تريدستيشن للسوق الامريكي اوعدد من وسطاء البنوك المحلية

بالنسبة لتحويل مبلغ للحساب او المحفظة ,يكون عن طريق الوسيط مباشرة ,تواصلي مع الوسيط الي فتحتي فيه المحفظة وراح يعطونك طريقة ايداع وسحب المبالغ من والى المحفظة ,غالبا بتكون عن طريق رقم حساب بنكي مخصص للمحفظة يتم تحويل المبالغ له ومن ثم تتحول للمحقظة بعد كذا يمكن استخدامه للتداول..

2024-07-24 01:00:20

حياك الله 

نعم يوجد جروب تلجرام تعليمي للنقاشات والاستفسارات وايضا يوجد قناة تلجرام تعليمية ،تجد روابطها اسفل الصفحة، اضغط على حسابات التواصل الاجتماعي فيها كل الحسابات الرسمية للسهم الممتنع

اما بالنسبة لسؤالك عن افضل فريم ،يعتمد على طريقة تداولك والفريمات الي تناسبك ،ولكن بشكل عام بالنسبة للمضاربة الفريم اليومي لتحديد الاتجاه الرئيسي ومناطق الدعوم و المقاومات القوية و فريم 4 ساعات لتحديد النماذج و الانماط الفنية والتصحيحات وفريم ساعة لتحديد اشارات الدخول وتحديد وقف الخسارة بشكل افضل.بس بالنسبة للمضارب اللحظي الي يضارب على فريمات صغيرة الفريمات هذي ماراح تفيده لأن اذا يتداول على الدقائق مثلا ماراح ينفعه الفريم اليومي.

كقاعدة خذ الفريم الي تداول عليه، هذا هو الفريم الي يعطيك اشارات الدخول ،اضربه في نطاق من 3 ل 5 الى 6 يعطيك الفريم الاكبر الي تستخدمه لتحديد الانماط الفنية الاكبر مثل الترندات او وين واصل التصحيح مثلا ،اضربه كذلك من 3 ل 5 يعطيك الفريم الرئيسي الي تحدد فيه الاتجاه العام واهم الدعوم والمقاومات الي ممكن تواجهها على المدى القريب.

مثلا اذا تداول على فريم 5 دقايق اضربه في 3 يعطيك 15،يصير تستخدم فريم 15 دقيقة كفريم أكبر ،اضربه في 4 يعطيك الفريم الرئيسي الاكبر الي هو فريم الساعة ،كذا راح تقدر تكون رؤية اوضح لحركة السعر.

 مع العلم في التداول كلما كبر الفريم اصبحت الاشارات افضل واقوى،وراح اسوي فيديو لشرح الفريمات المتعددة اتناول فيها هذي النقطة بالتفصيل ان شاء الله.

2024-07-14 22:04:50